Ranieri tekur við Grikklandi

Claudio Ranieri verður landsliðsþjálfari Grikklands næstu tvö árin. Hann tekur við starfinu af Fernando Santos sem hætti með liðið að HM í Brasilíu loknu. Grikkir féllu úr leik í 16-liða úrslitunum eftir tap gegn Kosta Ríku í vítaspyrnukeppni.

Ranieri hefur komið víða við á löngum ferli, en hann hefur m.a. þjálfað Chelsea, Atletico Madrid, Juventus, Inter og Roma. Hann var látinn fara frá Monaco eftir síðasta tímabil, þrátt fyrir að liðið hafi aldrei fengið fleiri stig (80) í frönsku úrvalsdeildinni.

Fyrsti leikur Grikklands undir stjórn Ranieri verður gegn Rúmeníu í undankeppni EM 2016.