Maradona: Markaðsöfl réðu því að Messi fékk Gullboltann

Knattspyrnugoðsögnin Diego Maradona lýsti vonbrigðum sínum með niðurstöðuna í úrslitaleik Argentínu og Þýskalands á HM í Brasilíu í gær.

Þýskaland vann, 1-0, með marki Mario Götze í framlengingu. „Ég finn til með þjóðinni minni. Það var virkilega sárt að sjá markið hans Götze,“ sagði Maradona í sjónvarpsþætti sínum, De Zurda, sem er sýndur í sjónvarpsstöð í Venesúela.

Maradona var í liði Argentínu sem mætti Þýskalandi í úrslitum HM tvívegis. Fyrst árið 1986, þegar Argentína vann, og svo fjórum árum síðar á Ítalíu þegar Þjóðverjar höfðu betur.

„Ég held að Argentína hafi að minnsta kosti átt skilið að komast í vítaspyrnukeppni. En Þýskaland vann vegna misskilnings í vörn Argentínu.“

Hann vorkenndi einnig Lionel Messi, fyrirliða Argentínu, sem var valinn besti leikmaður keppninnar og hlaut Gullboltann svokallaða eftir úrslitaleikinn.

„Greyið drengurinn. Ég myndi færa Leo himnaríki ef það væri hægt. En það er ekki rétt að láta einhvern vinna svona verðlaun út frá einhverri markaðsáætlun. Það er bara ekki rétt.“