Klinsmann: Berum of mikla virðingu fyrir Evrópuþjóðum

Jürgen Klinsmann, þjálfari bandaríska landsliðsins í knattspyrnu, segir sína menn bera of mikla virðingu fyrir andstæðingnum, en það er eitthvað sem þurfi að breytast fyrir næsta heimsmeistaramót. Hann nefnir þar sérstaklega Evrópuþjóðir.

Bandaríkin lentu 2-0 undir í framlengingu á móti Belgíu á þriðjudagskvöldið, en svöruðu því með marki og nokkrum góðum færum áður en flautað var til leiksloka. Belgía vann og Bandaríkin eru úr leik.

„Það er þetta hugarfar sem við þurfum að komast í gegnum um. Það áhugaverða er, að alltaf þegar við fáum á okkur mark skiptum við um gír og gefum andstæðingum okkar alvöru leik,“ sagði Klinsmann á síðasta blaðamannafundi sínum í Brasilíu.

„Það er eins og við berum of mikla virðingu fyrir mótherjanum. Þess vegna reyni ég að spila eins marga leiki og hægt er á móti Evrópuþjóðum. Já, það er allt í lagi að virða mótherjann en gerðu það utan vallar,“ sagði Jürgen Klinsmann.

Barack Obama, bandaríkjaforseti, sendi bandaríska liðinu kveðju en hann var ánægður með frammistöðu þess í Brasilíu.

„Þið gerðuð okkur stolt. Það var magnað að sjá hvernig þið fenguð alla þjóðina með ykkur,“ sagði forsetinn.