Innlent

Metfjöldi útskrifast úr Háskóla Íslands á morgun

Randver Kári Randversson skrifar
Metfjöldi verður útskrifaður úr Háskóla Íslands á morgun.
Metfjöldi verður útskrifaður úr Háskóla Íslands á morgun. Vísir/E.Ól.
Alls munu 2065 kandídatar taka við brautskráningarskírteinum sínum í grunn- og framhaldsnámi frá Háskóla Íslands á morgun, laugardaginn 21. júní, í Laugardalshöll, og er þetta mesti fjöldi sem brautskráður hefur verið frá skólanum frá stofnun hans.

Líkt og undanfarin ár verða brautskráningarathafnirnar tvær. Á þeirri fyrri, sem hefst kl. 10.30, fer fram brautskráning kandídata sem eru að ljúka framhaldsnámi að loknu grunnnámi, þ.e. diplóma- og viðbótarnámi á framhaldsstigi, meistaranámi og kandídatsnámi. Alls verða 777 kandídatar brautskráðir úr framhaldsnámi með 780 próf.

Við athöfnina verða þau tímamót að fyrstu kandídatarnir í nýju leikskóla- og grunnskólakennaranámi brautskrást með M.Ed.-gráðu frá Háskóla Íslands eftir fimm ára samfellt nám. Meistaragráðan veitir hinum nýútskrifuðu réttindi til að sækja um leyfisbréf leik- eða grunnskólakennara. Við athöfnina brautskrást einnig fyrstu nemendurnir með meistarapróf í listfræði frá Háskóla Íslands og geta þeir þá kallað sig listfræðinga.

Á seinni athöfninni, sem hefst kl. 14, fer fram brautskráning kandídata sem eru að ljúka grunnnámi, þ.e. BA-, B.Ed.- og BS-námi. Samtals brautskrást 1288 kandídatar  úr grunnnámi með 1292 próf.

Áætlað er að hvor athöfn standi yfir í um tvær klukkustundir.

Prófskírteini verða afhent í röð eftir fræðasviðum: Félagsvísindasvið, Heilbrigðisvísindasvið, Hugvísindasvið, Menntavísindasvið og Verkfræði- og náttúruvísindasvið. Á Félagsvísindasviði verða samtals afhent 689 prófskírteini, 464 á Heilbrigðisvísindasviði, 261 á Hugvísindasviði, 339 á Menntavísindasviði og 319 á Verkfræði- og náttúruvísindasviði.




Fleiri fréttir

Sjá meira


×