Klinsmann: Ég get ekki beðið um meira

Jürgen Klinsmann, þjálfari bandaríska landsliðsins, var ánægður með sitt lið eftir 2-2 jafnteflið við Portúgal í kvöld. Bandaríska liðið var aðeins tuttugu sekúndum frá því að vinna leikinn og tryggja sér sæti í sextán liða úrslitum á HM í Brasilíu.

„Þegar þú færð á þig jöfnunarmark á síðustu sekúndunni þá er það náttúrulega óheppilegt en þetta var stórbrotinn leikur hjá okkur. Ég get ekki beðið um meira. Nú þurfum við að bara að ná úrslitum á móti Þýskalandi og það ætlum við að gera," sagði Jürgen Klinsmann við BBC eftir leikinn.

„Við stjórnuðum leiknum eftir að við fengum þetta mark á okkur í upphafi og við áttum möguleika á því að skora þrjú til fjögur mörk til viðbótar. Við fáum með þessu enn meira sjálfstraust fyrir næsta leik sem er einn úrslitaleikur í viðbót. HM snýst bara um slíka leiki," sagði Klinsmann.

„Við vorum nálægt því að komast áfram en núna þurfum við bara að ná því á móti Þýskalandi. Þýskaland spilaði í gær og þýska liðið hefur lengri tíma til að jafna sig," sagði Klinsmann og var strax byrjaður að setja alla pressuna á þýska liðið.