Cristiano Ronaldo bjargaði Bandaríkjamönnum

Portúgalar og Ganverjar eru á leiðinni heim á HM í Brasilíu eftir að Portúgal vann 2-1 sigur á Gana í leik liðanna í lokaumferð G-riðils. Portúgala vantaði þrjú mörk í viðbót til að komast upp fyrir Bandaríkin og tryggja sér sæti í sextán liða úrslitunum.

Cristiano Ronaldo skoraði sigurmark portúgalska landsliðsins í leiknum sem var hans fyrsta mark á HM í Brasilíu. Markið kom til vegna klaufagangs í vörn Gana alveg eins og fyrra mark Portúgals sem var sjálfsmark.

Asamoah Gyan jafnaði metin fyrir Gana á 57. mínútu og þá þurftu Ganverjar aðeins eitt mark til þess að tryggja sér sæti í sextán liða úrslitunum.

Það mark kom hinsvegar ekki og Ronaldo kláraði leikinn með því að skora sigurmarkið tíu mínútum fyrir leikslok.

Cristiano Ronaldo fékk nokkur góð tækifæri til þess að bæta við mörkum á lokamínútum leiksins en tókst ekki að skora úr þeim.

Þetta er í fyrsta sinn í fimm stórkeppnum sem Portúgalar komast ekki upp úr riðlakeppninni en þeir komust í undanúrslit á EM 2012 og í sextán liða úrslitin á HM 2010. Nú gekk hinsvegar ekkert upp hjá Ronaldo og félögum.

Gana hafði komist upp úr sínum riðli á síðustu tveimur heimsmeistaramótum og fór alla leið í átta liða úrslitin fyrir fjórum árum.