Messi vaknaði í seinni hálfleik og kláraði Bosníu | Myndir

Argentína vann Bosníu og Hersegóvínu, 2-1, í fyrsta leik liðsins á HM 2014 en sigurmarkið skoraði að sjálfsögðu snillingurinn LionelMessi.

Hann var þó arfadapur í fyrri hálfleik líkt og allt argentínska liðið sem komst yfir með sjálfsmarki Sead Kolasinac strax á þriðju mínútu.

Argentínumenn héldu boltanum ágætlega en sóknarlotur þeirra til að byrja með voru hægar og fyrirsjáanlegar. Bosníumenn voru aftur á móti nokkuð sprækir og reyndu hvað þeir gátu að jafna.

Í seinni hálfleik vaknaði Lionel Messi til lífsins en hann kom boltanum varla á samherja í þeim fyrri. Hann skoraði annað markið með skoti í stöngina og inn eftir glæsilegt samspil við GonzaloHiguaín, 2-0.

Bosnía virtist ekki líkleg til afreka en varamaðurinn VedadIbisevic hleypti smá lífi í leikinn undir lokin þegar hann skoraði af stuttu færi á 84. mínútu, 2-1. Lengra komust Bosníumenn þó ekki.

Argentína með þrjú stig eftir einn leik en Bosníumenn án stiga. Íran og Nígería mætast í sama riðli á morgun.