Vidal: Spánverjar munu mæta grimmir til leiks

Miðjumaðurinn Arturo Vidal segir að hann og félagar hans í landsliði Chile eigi von á erfiðum leik gegn Spánverjum þegar liðin mætast í B-riðli heimsmeistaramótsins á miðvikudaginn.

"Við vitum að þeir munu mæta grimmir til leiks og við verðum að vera tilbúnir," sagði Vidal, en Spánverjar töpuðu sem frægt er orðið fyrir Hollandi með fimm mörkum gegn einu á föstudaginn.

"Enginn bjóst við að þeir myndu tapa svona stórt."

Vidal, sem hefur orðið Ítalíumeistari með Juventus síðustu þrjú ár, lék í klukkutíma þegar Chile vann Ástralíu á föstudaginn, en hann hefur glímt við meiðsli að undanförnu.

"Ég hafði ekki spilað í nokkurn tíma. Þú vilt alltaf vera í þínu besta ásigkomulagi, en sú hefur ekki verið raunin hjá mér að undanförnu.

"Það mikilvægasta er að ég spilaði á föstudaginn," sagði Vidal, sem hefur leikið 55 landsleiki fyrir Chile og skorað átta mörk.