Versta kjörsókn í Reyjavík síðan 1928

Kjörsóknin í sveitarstjórnarkosningunum sem nú eru að baki var með dræmasta móti og hafa stjórnmálafræðingar landsins ekki sparað gífuryrðin í umfjöllunum sínum um kosningaþátttökuna í ár.

Um 66 prósent atkvæðabærra manna kusu í ár og hefur kjörsóknin ekki verið verri í Reykjavík síðan 1928. 

Eiríkur Bergmann sagði í samtali við Vísi að kjörsóknin væri „auðvitað eitthvað það magnaðasta fall sem við höfum nokkurn tímann séð og lýsir einhverju óþoli sem við höfum aldrei nokkurn tímann upplifað áður í stjórnmálum á Íslandi.“



Stefanía Óskarsdóttir tók í sama streng og vildi hún meðal annars rekja hana til breyttra viðhorfa Íslendinga til stjórnmála á Íslandi. „Fólk telur sig ekki lengur einungis geta haft áhrif á kjördag,“ sagði hún í samtali við Vísi gærkvöldi og bætti við að kjósendur séu í meira mæli en áður farnir að senda dóm sinn meðan á kjörtímabilinu stendur.

Þó lítið sé hægt að fullyrða um áhrif kosningaþátttökunnar á úrslit sveitarstjórnarkosninganna í ár leiddi Ólafur Þ. Harðarson líkur að því á RÚV að Framsókn og Sjálfstæðisflokkurinn hafi notið góðs af henni sökum aldursdreifingar kjósendahópsins.

Hér að neðan má sjá nánari útlistun á þátttökunni í ár og áhugavert er að bera hana saman við kjörsókn Íslendinga í sveitarstjórnarkosningunum fyrir fjórum árum síðan.

Í stærstu sveitarfélögum landsins er hún umtalsvert lakari nú en þá, ef frá er talin kosningaþátttakan á Akranesi.



Reykjavík

Á kjörskrá: 90.489

Kjörsókn í ár: 62,7%

Kjörsókn árið 2010: 73,5%

Kópavogur

Á kjörskrá: 23.616

Kjörsókn í ár: 60,8%

Kjörsókn árið 2010: 68,8%

Hafnarfjörður

Á kjörskrá: 19.699

Kjörsókn í ár: 60,5%

Kjörsókn árið 2010: 65,0



Akureyri

Á kjörskrá: 13.347

Kjörsókn í ár: 67,1%

Kjörsókn árið 2010: 74,7%

Garðabær

Á kjörskrá: 10.448

Kjörsókn í ár: 66,0%

Kjörsókn árið 2010: 70,9 %

Mosfellsbær

Á kjörskrá: 6.440

Kjörsókn í ár: 63,1%

Kjörsókn árið 2010: 68,0 %

Árborg

Á kjörskrá: 5.724

Kjörsókn í ár: 72,8%

Kjörsókn árið 2010: 76,4%

Akranes

Á kjörskrá: 4.789

Kjörsókn í ár: 83,0%

Kjörsókn árið 2010: 69,2%

Fjarðabyggð

Á kjörskrá: 3.362

Kjörsókn í ár: 65,9%

Kjörsókn árið 2010: 73,3%