Eitt ár frá andláti Hemma Gunn

Fjölmiðlamaðurinn ástsæli, Hermann Gunnarsson, lést fyrir einu ári síðan í dag eða þann 4. júní 2013.

Hermann var aðeins 66 ára að aldri þegar hann varð bráðkvaddur á Taílandi þar sem hann var staddur í fríi.

Í dag verður afhjúpaður sérstakur minningarveggur um Hemma á Ölveri klukkan 15 en Tólfan, stuðningsmannafélag karlalandsliðsins í fótbolta, stóð fyrir því að reistur yrði minningarveggur um Hermann. 

Hermann, sem flestir landsmenn þekkja sem Hemma Gunn, fæddist í Reykjavík 9. desember 1946 og foreldrar hans voru Björg Sigríður Hermannsdóttir og Gunnar Gíslason.

Hermann var einn fremsti knattspyrnumaður landsins á sjöunda áratugnum og spilaði með Val á blómaskeiði félagsins. Hemmi þótti einnig nokkuð liðtækur í handbolta og lék nokkra landsleiki í íþróttinni. Hann átti meðal annars markametið yfir flest mörk skoruð í landsleik í mörg ár.

Að knattspyrnuferlinum loknum hóf hann störf sem íþróttafréttamaður hjá Sjónvarpinu. Á níunda áratugnum hóf hann að stjórna sínum eigin sjónvarpsþætti hjá RÚV, Á tali hjá Hemma Gunn, og náði þátturinn miklum vinsældum.

Þá starfaði hann um árabil hjá 365, bæði við dagskrárgerð í útvarpi og sjónvarpi. Hermann lét af störfum hjá fyrirtækinu í lok apríl og hugðist leggja lokahönd á sjálfsævisögu sína, Lífshlaup Hemma.