Aldarfjórðungur frá blóðbaðinu

Þann 4. júní árið 1989 bárust fregnir utan úr heimi af skelfilegum fjöldamorðum á mótmælendum á Torgi hins himneska friðar í Peking, þar sem kínverskir hermenn réðust til atlögu, vopnaðir skriðdrekum og rifflum, gegn stúdentum sem boðað höfðu til friðsamlegra mótmæla á torginu.

Atburðarins var minnst víða um heim í dag, og eru yfirvöld í Kína enn harðlega gagnrýnd fyrir að hafa aldrei viðurkennt opinberlega þau mannréttindabrot sem þar áttu sér stað.

Þá hafa yfirvöld þar í landi aldrei gefið út opinberlega hversu margir létust í átökunum.

Mikill viðbúnaður var við torgið í dag, erlendum fréttamönnum var meinaður aðgangur að torginu og þá hefur verið hert verulega á ritskoðun á netinu í Kína, og yfirvöld lokað  öllum vefsíðum sem minnast atburðanna.

Salil Shetty framkvæmdastjóri Amnesty International, sagði aðdraganda minningardagsins prófraun fyrir Xi Jinping, forseta Kína og yfirlýsingar hans um opnara samfélag. Hann hafi hinsvegar fallið á prófinu og kosið kúgun fram yfir umbætur.