Börðu mann með borðfæti og tröðkuðu á andliti hans

Aðalmeðferð í máli þriggja manna á aldrinum 48 til 60 ára fór fram í Héraðsdómi Reykjavíkur í dag. Mennirnir eru ákærðir fyrir sérstaklega hættulega líkamsárás sem átti sér stað 19.maí 2012 utan við smáhýsi við Fiskislóð 16.

Einum manninum er gefið að sök að hafa sparkað í vinstri síðu annars manns, barið hann með borðfæti og traðkað á höfði hans. Hann gekkst við brotunum, en gekkst ekki við að hafa notað barefli né að hafa traðkað á höfði mannsins.

Þá er öðrum jafnframt gefið að sök að hafa slegið manninn með borðfæti og sá þriðji, Sævar Arnfjörð Hreiðarsson, sló manninn tveimur höggum í andlitið. Báðir neita sök.

„Ég er sextugur, hvað heldurðu að ég sé að slást. Ég nenni því ekki einu sinni,“ sagði Sævar í vitnastúku í dag. Sævar á að baki langan afbrotaferil, eða allt frá árinu 1972.  „Ég var eitthvað smá vímaður. Bara smá gras,“ sagði Sævar.

„En ég hef verið edrú í góðan tíma. Ég tel mig hafa sóað lífi mínu en nú er nóg komið. Nú er ég farinn að haga mér eins og maður.“

Maðurinn var fluttur á gjörgæsludeild Landspítalans í kjölfar árásarinnar þar sem hann dvaldi í tvo daga. Þaðan var hann fluttur á almenna deild þar sem hann dvaldi í tæpar tvær vikur. Í aðalmeðferðinni í dag sagðist hann hafa verið undir áhrifum áfengis og vímuefna. Árásarmennirnir voru einnig allir undir áhrifum áfengis. 

„Hann var bara blindfullur og ruglaður. Hann lamdi mig fyrir utan smáhýsin og ég flúði inn. Ég lagðist í sófann og þar byrjuðu þeir allir að berja mig. Undir lokin var ég síðan farinn að detta út og man ekki mikið,“ sagði maðurinn í vitnastúku í dag.

Lögreglumaður sem bar vitni í málinu, og tók af manninum skýrslu á slysadeild Landspítalans, sagði áverkana hafa verið mikla. Maðurinn hefði átt erfitt með tal og verið óskýr í máli en þó hafi hann náð að halda uppi samræðum.

Maðurinn hlaut mikið mar frá vinstri kinn og niður á kvið, hlaut tvö rifbeinsbrot, mar á lifur og framan á vinstra læri og loftbrjóst vinstra megin.

Krafist er að ákærðu verði dæmdir til refsingar auk greiðslu alls sakarkostnaðar. Fórnarlambið krefst 2,5 milljóna króna í miskabætur.

Aðalmeðferð málsins var frestað í dag vegna þess að ekki öll vitni mættu fyrir dóm. Aðalmeðferðin heldur áfram 20. júní næstkomandi.