Norður-Kóreubúi tekinn af lífi fyrir ólöglegt símtal

Ri Kyung Ho, 49 ára íbúi Norður-Kóreu sem býr í norðurhluta landsins var tekinn af lífi í mars fyrir að hafa hringt til Suður-Kóreu og hjálpað fólki að flýja land. Samkvæmt heimildum DailyNK var fjölskylda hans fangelsuð eftir aftökuna.

Guardian hefur einnig fjallað um málið.

Aftakan er hluti af átaki stjórnvalda gegn farsímanotendum og smyglurum sem hófst í fyrra. Nýverið var hegningarlögum landsins breytt. Aftakan mun hafa verið notuð til að hafa áhrif á aðra íbúa landsins, en var þó ekki opinber.

Samkvæmt heimildum DailyNK var Ri Kyung Ho handsamaður eftir að hann hringdi í ættingja sína í Suður-Kóreu. Öryggissveitir nota búnað sem greinir símabylgjur til að hafa uppi á fólki sem hringir úr farsímum.

„Hann hafði líklega ekki tíma til að taka símann í sundur og fela hann áður en útsendararnir komu heim til hans,“ segir ónefndur heimildamaður DNK. Við yfirheyrslur kom í ljós að Ri Kyung Ho hafði ekki eingöngu hringt reglulega til Suður-Kóreu, heldur hafði hann einnig hjálpað fólki að flýja Norður-Kóreu.

Að minnsta kosti fimm ára „endurmenntun“ eða dauði eru mögulegar refsingar fyrir að hafa samband við aðila fyrir utan landsteina Norður-Kóreu. Fyrir það eitt að horfa á sjónvarpsútsendingar eða hlusta á útvarpsstöðvar frá Suður-Kóreu er refsingin tíu ára „endurmenntun“ hið minnsta.

Lágmarksrefsing fyrir fíkniefnasmygl eru fimm ára „endurmenntun“.