Alejandro Sabella skorar á liðsfélaga Messi

Alejandro Sabella, þjálfari argentínska landsliðsins skoraði á leikmenn argentínska landsliðsins á blaðamannafundi að aðstoða Lionel Messi á Heimsmeistaramótinu sem er framundan.

Messi sem er af mörgum talinn einn besti fótboltamaður í heimi er fyrirliði liðsins en hefur ekki tekist að spila jafn vel með argentínska liðinu og með Barcelona. Gríðarlega háar væntingar eru gerðar til argentínska liðsins fyrir mótið sem hefst eftir sextán daga.

Margir af leikmönnum liðsins eru ekki að spila sitt fyrsta mót og hafa tekið þátt í slíkum mótum með Messi.

"Strákarnir þurfa að hjálpa Leo, við getum ekki sett alla ábyrgðina á hans herðar. Hann er öðruvísi leiðtogi, hann er leiðtogi með ótrúlega hæfileika í fótbolta," sagði Sabella.

Sabella gerði lítið úr ákvörðun sinni að skilja eftir Carlos Tevez, leikmann Juventus.

"Ég vill byrja á því að taka fyrir þá hugmynd að leikmennirnir vildu ekki fá Tevez í þetta verkefni. Það væri rangt að segja það því hann er frábær leikmaður. Hann er óheppinn því við erum með frábæra framherja. Higuain, Messi, Lavezzi, Aguero og Palacio hafa allir staðið sig vel undanfarna mánuði," sagði Sabella.