Bætti metið fyrir framan 100 þúsund áhorfendur

Yossi Benayoun er orðinn leikjahæsti landsliðsmaður Ísraels frá upphafi en hann bætti metið í vináttulandsleik gegn Mexíkó í gær.

Mexíkó vann leikinn, 3-0, en hann fór fram á Azteca-leikvanginum sem tekur nærri 100 þúsund áhorfendur.

„Það var sérstakt að slá metið á þessum leikvangi,“ sagði Benayoun eftir leikinn en þetta var hans 95. landsleikur. „Þetta er mikill áfangi fyrir mig.“

Sá sem átti metið áður var Arik Benado sem er nú aðstoðarþjálfari landsliðsins. „Það var gaman að hafa hann á vellinum líka,“ bætti Benayoun við. Hann lék sinn fyrsta landsleik árið 1998 og var á mála hjá QPR í vetur.

„Markmið mitt er að halda áfram. Landsliðið hefur verið það mikilvægasta sem ég hef gert á mínum ferli og ég vil ekki hætta núna,“ sagði hinn 34 ára gamli Benayoun.