Dýrasti HM-leikvangurinn í Brasilíu kostaði meira en 102 milljarða

Brasilíumenn halda HM í fótbolta í sumar en þeir hafa eytt stórum upphæðum úr ríkiskassanum til að byggja eða gera upp leikvanga heimsmeistarakeppninnar.

Fréttir af spillingu og hægagangi í byggingu leikvanganna hefur verið daglegt brauð síðustu mánuðina en það er einn leikvangur sem sker sig úr hvað varðar kostnað.

Kostnaðurinn við Mane Garrincha National leikvangurinn í Brasilíuborg hefur þrefaldast og nú stefnir í það að hann muni kosta brasilíska ríkið rúma 102 milljarða íslenskra króna.

Mane Garrincha National verður þar með næstdýrasti knattspyrnuleikvangur sögunnar á eftir Wembley-leikvanginum í London.

Það sem er kannski mest stingandi við þessar fréttir er að umræddur leikvangur verður vissulega notaður í sex vikur á meðan HM stendur yfir en það er hinsvegar ekkert atvinnumanna fótboltafélag í borginni.

Spilling er talin vera aðalástæðan fyrir gríðarlega aukningu á byggingakostaði leikvangsins en endurskoðendur Brasilíustjórnar skiluðu frá sér svartri skýrslu á dögunum.

Heildarkostnaðurinn við leikvangana tólf á HM í sumar er nú kominn upp í þrettán hundruð milljarða íslenskra króna sem er fjórfalt meira en áætlun FIFA hljóðaði upp á þegar Brasilíumenn fengu heimsmeistarakeppnina árið 2007.