Katrín Jakobsdóttir: Er réttlæti ávallt haft að leiðarljósi þegar lög eru sett?

Katrín Jakobsdóttir, formaður Vinstri hreyfingarinnar - græns framboðs, lagði mikla áherslu á réttlæti í sinni ræðu í eldhúsdagsumræðum á Alþingi nú í kvöld. Hún velti því fyrir sér hvort réttlæti sé haft að leiðarljósi þegar lög eru sett á Alþingi í dag. „Er réttlæti ávallt haft að leiðarljósi þegar lög eru sett, fjármunum er úthlutað, ákvarðanir eru teknar?“ 

Katrín segir að þetta sé það sem landsmenn verði að spyrja sig að þegar gjörðir ríkisstjórnarinnar eru skoðaðar þennan fyrsta vetur sem hún situr. 



"Var það réttlætið sem réð för þegar ákveðið var að lækka veiðigjöld á útgerðina um átta og hálfan milljarð á ársgrundvelli? Var það réttlæti sem réð för þegar ákveðið var að lækka gjöld á áfengi og tóbak en hækka komugjöld á heilsugæslu?“ spyr Katrín Jakobsdóttir. Og hún hélt áfram.  „Var það réttlæti sem réð för þegar ákveðið var að hækka álögur á námsmenn í háskólum sem runnu beint til þess að niðurgreiða niðurskurð á háskólana? Er það réttlæti sem ræður för þegar ríkisstjórnin ákveður að framlengja ekki auðlegðarskatt sem lagður var á stóreignafólk þessa lands þegar reisa þurfti samfélagið við eftir efnahagshrun? Er það réttlæti sem ræður för þegar við tökum á móti hælisleitendum og innflytjendum og sendum suma til baka og stíum þar jafnvel í sundur fjölskyldum?  Eru þetta réttlátar aðgerðir sem skila réttlátara samfélagi? Nei –ríkisstjórnin hefur ekki staðist réttlætisprófið.“

Katrín vill meina að mikilvægt sé að hafa réttlætissjónarmiðið að leiðarljósi, að kjörnir fulltrúar geti tekið sem réttlátastar ákvarðanir í þágu allra landsmanna. Réttlæti sé ekki pólitísk klisja sem dó út á síðustu öld.

Tweets about '#eldhusdagur'