Fjölskyldukötturinn bjargaði einhverfum dreng frá óðum hundi

„Tara er hetjan mín,“ segir Jeremy Triantafilo. Fjölskyldukötturinn, Tara, bjargaði honum nýverið frá árás hunds sem beit hann í fótinn. Kötturinn réðst þá á hundinn og stökkti honum á flótta, en atvikið náðist á myndband.

Frá þessu er sagt á vefnum Turnto23.com.

Jeremy, sem er með einhverfu, var nýkominn heim úr skóla og var að hjóla í innkeyrslunni, þegar hundur nágranna laumast aftan að honum, bítur hann í fótinn og dregur hann aftur á bak. Móðir Jeremy heyrði hann öskra, en sá ekki hvað gerðist.

„Ég áttaði mig ekki á því hvað gerðist fyrr en ég sá myndbandið,“ sagði hún við fréttamann ABC. Sauma þurfti Jeremy nokkrum sporum en annars ber hann sig vel.

Hundinum verður lógað samkvæmt talsmanni lögreglunnar í Bakersfield, eftir tíu daga einangrun.