Valsmenn keyptu Patrick Pedersen frá Vendsyssel

Patrick Pedersen verður aftur með Val í Pepsi-deildinni á þessu tímabili en Hlíðarendafélagið keypti danska framherjann frá Vendsyssel í Danmörku. Danska félagið segir frá þessu á heimasíðu sinni í dag.

Valsmenn fengu Patrick Pedersen á láni síðasta sumar og skoraði hann þá 5 mörk í 9 leikjum í Pepsi-deildinni. Valsliðið tapaði aðeins þremur af þessum níu leikjum þar af tveimur þeirra á móti verðandi Íslandsmeisturum KR. Pedersen átti einnig tvær stoðsendingar og fiskaði eitt víti sem gaf mark.

„Vendsyssel FF fékk mjög flott tilboð og þar sem Patrick óskaði á sama tíma eftir meiri spiltíma þá ákváðum við að samþykkja tilboðið frá Val," segir í frétt á heimaíðu Vendsyssel.

Patrick Pedersen er 22 ára gamall framherji og mun væntanlega spila sinn fyrsta leik með Val á móti Fram á mánudagskvöldið en leikurinn verður sýndur beint á Stöð 2 Sport.