KR og FH mætast í bikarnum

Bikarkeppnin í ár byrjar með flugeldasýningu. KR og FH drógust nefnilega saman í 32 liða úrslitum Borgunarbikars karla í fótbolta en dregið var í höfuðstöðvum KSÍ í dag.

Pepsi-deildarliðin koma núna inn í bikarkeppnina en það hafa þegar farið fram tvær umferðir þar sem fjögur 1. deildarlið féllu meðal annars úr keppni.

KR kom fyrst upp úr pottinum og Kristinn Kjærnested, formaður Knattspyrnudeildar KR, dró síðan FH upp úr pottinum og fékk sterk viðbrögð við því úr salnum.

Leikur FH og KR er jafnframt eini Pepsi-deildarslagurinn í þessari umferð en öll hin tíu liðin úr Pepsi-deildinni fengu mótherja úr neðri deildunum.

Eini leikurinn sem er líka milli liða úr sömu deild er 2. deildarslagur Aftureldingar og ÍR.

Bikarmeistarar Fram fá 1. deildarlið KA í heimsókn í Laugardalinn en sá leikur fer líklega fram á gervigrasvellinum. Kópavogsliðin Breiðablik og HK drógust einnig saman

Leikirnir í 32 liða úrslitum Borgunarbikars karla fara fram í lok mánaðarins eða frá 26. maí til 28. maí.

Leikirnir í 32 liða úrslitum Borgunarbikars karla 2014:

Fjölnir (A-deild) - Dalvík/Reynir (C-deild)

Sindri (C) - KV (B)

Fram (A) - KA (B)

KR (A) - FH (A)

KFG (E) - Þróttur R. (B)

BÍ/Bolungarvík (B) - Fjarðabyggð (C)

Augnablik (E) - Keflavík (A)

HK (B) - Breiðablik (A)

Víðir (D) - Valur (A)

Fylkir (A) - Njarðvík (C)

Hamar (D) - KF (C)

Víkingur R. (A) - Grindavík (B)

ÍBV (A) - Haukar (B)

Afturelding (C) - ÍR (C)

Stjarnan (A) - Selfoss (B)

ÍH (D) - Þór (A)