Soldáninn af Brunei á í vök að verjast í Hollywood

Margar af skærustu stjörnum Hollywood hafa sagst ætla að sniðganga eitt frægasta hótelið á svæðinu, Beverly Hills Hotel, til þess að láta í ljós andúð sína á nýjum lögum sem sett voru á dögunum í furstadæminu Brunei.

Ástæðan fyrir því að það bitnar á hótelinu er sú að það er einmitt í eigu soldánsins af Brunei. Á meðal þeirra sem þátt taka í mótmælunum eru grínistarnir Jay Leno og Ellen De Generes en Brunei-búar þurfa nú að búa við mjög íhaldssama útgáfu af íslamskri lagasetningu þar sem meðal annars er gert ráð fyrir því að samkynhneigðir og þeir sem stunda framhjáhald verði grýttir til bana. Þá hefur milljarðamæringurinn Richard Branson, sem meðal annars á Virgin flugfélagið lýst því yfir að hvorki hann né hans fyrirtæki muni eiga í nokkrum samskiptum við hótel í eigu soldánsins.