Íslendingur í Austur-Úkraínu: Hér er mikil hræðsla

Íslendingur, sem dvelur í austurhluta Úkraínu, segir að uppreisnarhópar leggi nú kapp á að sprengja upp friðarsáttmála sem skrifað var undir í Genf í síðustu viku vegna stigvaxandi átaka í landinu. Hann segir mikla hræðslu á svæðinu. 

Fulltrúar Evrópusabandsins, Bandaríkjanna, Úkraínu og Rússlands skrifuðu undir samkomulagið. Lítið virðist þó hafa breyst frá því það var undirritað, og í dag sakaði utanríkisráðherra Rússlands stjórnvöld í Kænugarði um að brot á samningnum með því að grípa ekki til aðgerða til að stöðva ólöglega uppreisnarhópa og öfgaþjóðernissinna, sem hann segir ráða lögum og lofum í austurhéruðunum.

Hermann Valsson er búsettur í borginni Sumy. Hann segir að fólk óttist að uppreisnarhópum takist að fella friðarsáttmálann úr gildi. 

„Það er mikil hræðsla í fólki. Það eru mörg öfl sem eru að reyna að sprengja um sáttmálann sem var gerður í Genf. Þá erum við að horfa til aðskilnaðarsinna, úkraínskra öfgahópa og hersins,“ segir Hermann.

Forsetakosningar verða í Úkraínu 25. maí næstkomandi, en síðan Viktor Janókóvitsj forseta var steypt af stóli hefur Olexander Tjortjinov verið settur forseti í bráðabyrgðastjórn landsins. Hermann segir fólk binda miklar vonir við kosningarnar, en marga óttast að stríð brjótist út áður en hægt verður að ganga til kosninga. 

„Grimmdin og hræðslan í austurhluta Úkraínu er vegna þess að öfgahóparnir eru að reyna að sprengja allt upp áður en niðurstöður kosninganna liggja fyrir. Það er bara vonandi að það gerist ekki.“ segir Hermann.