Hertar þvinganir gegn Rússum

G7 ríkin kynntu í gær að frekari refsiaðgerðum yrði beitt gegn Rússlandi vegna Úkraínudeilunnar. Í sameiginlegri yfirlýsingu segir að ríkin hafi miklar áhyggjur af aðgerðum aðskilnaðarsinna í austurhluta Úkraínu, sem studdir séu af Rússlandi.

Þar er þó ekki skilgreint hverjar þvinganirnar séu, en þar segir að tilefni þvingananna sé að stuðla að auknum friði í landinu fyrir forsetakosningarnar 25. maí.

Ríkin segja stjórnvöld í Kænugarði hafa reynt að draga úr spennu á svæðinu, samkvæmt samkomulagi sem undirritað var í Genf þann 17. apríl, af Úkraínu, Rússlandi, ESB og Bandaríkjunum. Stjórnvöld vinni að stjórnarskrárbreytingum, að draga úr miðstýringu og hafi stungið upp á lögum um almenna uppgjöf saka, yfirgefi aðskilnaðarsinnar þær byggingar sem þeir stjórni, friðsamlega.

Aftur á móti segir að Rússland hafi engin skref tekið til að styðja við samkomulagið. Stjórnvöld þar hafi hvorki lýst því yfir að þeir ætli að standa við samkomulagið, né fordæmt aðgerðir aðskilnaðarsinnanna. Þá hafi þeir ekki kallað eftir því að aðskilnaðarsinnarnir leggi niður vopn sín.

Þess í stað hafi stjórnvöld í Rússlandi aukið við spennu á svæðinu með miklum áróðri og ógnangi hernaðaraðgerðum við landamæri Úkraínu.

Þá undirbúa ríkin frekari aðgerðir gegn Rússlandi, en hvetja Rússa til að setjast við samningaborðið og finna lausn á deilunni í samræmi við Genf sáttmálann.

Bandaríkin, Bretland, Frakkland, Þýskaland, Kanada, Ítalía og Japan standa að G7 ríkjunum.