Leitarsvæðið á Indlandshafi hefur aldrei verið minna

Leitarsvæðið þar sem talið er að farþegaþota með 239 manns innanborðs hafi hrapað á Indlandshafi þann áttunda mars síðastliðinn hefur nú verið þrengt verulega. Nú leita fjórtán flugvélar og 13 skip á svæði sem er um 57 þúsund ferkílómetrar að flatarmáli en það er í fyrsta sinn sem allri athyglinni er beint á svo lítið svæði.

Hljóðmerki frá flugrita vélarinnar hefur ekki heyrst frá því á þriðjudag en möguleiki er talinn á því að rafhlöður kassans séu orðnar tómar, enda eiga þær aðeins að lifa í þrjátíu daga eftir að hljóðmerki taka að berast frá ritanum.