Fannst vannærður og illa haldinn inni í fataskáp

Lögreglan í Houston í Bandaríkjunum hefur handtekið foreldra fyrir að hafa haldið fimm ára gömlu barni sínu föngnum inni í fataskáp.

16 ára bróðir drengsins lenti í áflogum við föður sinn, Bradley Bleimeyer, síðastliðinn þriðjudag og er talið að hann hafi verið að verja bróður sinn. Nágrannar heyrðu til og kölluðu til lögreglu.

Þegar lögreglan mætti á staðinn hafði Bleimeyer og Tammi Bleimeyer, stjúpmamma drengjanna, flúið vettvang og tekið unga drenginn með sér.

Á föstudaginn hafði lögreglan síðan upp á foreldrunum og þurfti að flytja drenginn rakleitt á bráðamóttökuna.

Mark Herman, aðstoðaryfirlögregluþjónn, á svæðinu segir í bandarískum fjölmiðlum að hann hafi aldrei á sínum ferli séð annað eins.

„Drengurinn var alvarlega vannærður og sást það mjög vel á líkama hans. Einnig voru áverkar um líkamlegt ofbeldi sem hann hafði orðið fyrir,“ sagði Herman við fjölmiðla.

Lögreglan handtók umsvifalaust foreldrana og hafa þau verið ákærð.

Drengurinn er enn á spítala og í umsjón barnaverndarnefndar í Bandaríkjunum.