Tveggja ára drengur hringdi á neyðarlínuna

„Mamma er sofandi,“ sagði tveggja ára drengur frá enska bænum Barrow-Upon-Soar við starfmann neyðarlínunnar þar í landi. Með því að hringja í neyðarlínuna bjargaði hann lífi móður sinnar, að sögn sjúkraflutningamannanna sem komu á staðinn.

Á spítalanum kom í ljós að móðir drengsins var með blóðtappa og hættulegar innvortis blæðingar í eggjastokkum.

Í gær fékk drengurinn, Riley Ward, verðlaun frá ensku neyðarlínunni. Talið er að hann sé yngstur allra sem hafa hringt á sjúkrabíl.

Ákvað að taka þessu alvarlega

Móðir drengsins, Dana Henry, lá á gólfinu meðvitundarlaus þegar Riley litli ákvað að hringja á sjúkrabíl. Hann hafði nýlega lært að tala. Foreldrar hans höfðu kennt honum að hringja á neyðarlínuna ef eitthvað kæmi upp á. Drengurinn brást ekki á ögurstundu.

Starfsmaður neyðarlínunnar ákvað að taka orð drengsins trúanleg og sendi sjúkrabíl í snarhasti á staðinn.

„Þegar á rankaði við mér sá ég Riley sitjandi á dótakassanum sínum og sá blá ljós í glugganum. Ég reyndi að standa upp en féll aftur niður,“ útskýrir Dana.

Væri ekki hér í dag

Dana segir að ef ekki hafi liðið yfir hana hefði hún aldrei farið á spítala. „Ég hefði bara haldið áfram að taka verkjalyf og vonast til þess að verkurinn hafi farið,“ útskýrir Dana og bætir við:

„Ef það hefði ekki liðið yfir mig og Riley hefði ekki hringt á sjúkrabíl væri ég ekki hér í dag.“

Hún segist stolt af syni sínum. „Það kom mér svo á óvart að hann hafi munað þetta. Við vorum búin að kenna honum þetta og að honum hafi tekist að framkvæma þetta er stórkostlegt. Hann er hetja móður sinnar,“ segir Dana stolt.