Vill sjá skólastjórnendur sækja um undanþágur vegna fatlaðra

„Ég horfi fyrst og fremst til undanþága og möguleika á þeim samkvæmt lögum. Ég vona að skólastjórnendur framhaldsskóla sæki um undanþágur til nefndarinnar þannig að fatlaðir nemendur geti fengið að stunda sitt nám áfram,“ segir Jón Gnarr aðspurður um það hvort Reykjavíkurborg ætli sér komast til móts við fatlaða nemendur og fjölskyldur þeirra.

„Ég veit ekki til þess að neinn hafi sótt um undanþágu en ég myndi að minnsta kosti vilja sjá einhvern sækja um slíkt,“ segir Jón.

Landssamtökin Þroskahjálp hafa skorað á Félag framhaldsskólakennara að veita tafarlaust undanþágu frá verkfalli framhaldsskólakennara sem sinna kennslu fatlaðra nemenda.

Að sögn Sigurðar Inga Andréssonar, formanns verkfallsstjórnar Félags framhaldsskólakennara verðaslíkar beiðnir að koma frá aðilum verkfallsins, til dæmis skólastjórum. Ef um sé að ræða ríkisrekinn skóla eru slíkar beiðnir afgreiddar af undanþágunefnd.

Engin slík beiðni hefur borist frá ríkisreknum framhaldsskóla.

Frístundaúrræði fyrir fatlaða til skoðunar

Foreldrar fatlaðra barna í framhaldsskólum hafa greint frá erfiðleikum sínum hvað úrræði fyrir börn þeirra varðar. Margir verða að taka sér frí frá vinnu og treysta á skilningsríka vinnuveitendur, fjölskyldu og vini.

„Það sem er verst af öllu í þessu er að dóttir mín þarf reglufestu og öll frávik hafa ekki góð áhrif á hennar lífsgæði. Sérstaklega þetta með skammtímavistunina þar sem hún er á nóttunni og er svo keyrð heim á daginn. Það er mjög erfitt að útskýra það,“ sagði Atli Lýðsson, faðir 17 ára fatlaðrar stúlku í samtali við Vísi í gær.

Verið er að skoða innan kerfis hjá borginni hvort einhverjir möguleikar séu á úrræðum fyrir þessa nemendur. „Við þurfum líka að gæta að eðli og aðstæðum því ekki megum við verða verkfallsbrjótar,“ segir Jón.

Þegar hefur komið fram í fréttum að verkfallsstjórn líti ekki á það sem verkfallsbrot ætli borgin eða bæjarfélög að bjóða upp á einhverskonar frístundaúrræði fyrir fötluð ungmenni á daginn.

„Það liggur ekkert fyrir að svo stöddu en við erum að skoða möguleika,“ segir Jón.