Fólk ekki samkynhneigt ef kýr eru það ekki

Forsetafrú Úganda, Janet Museveni, fullyrti í nýlegri ræðu að samkynhneigð væri ónáttúruleg. Sér til rökstuðnings segir hún að þar eð engar kýr væru samkynhneigðar, væri óhugsandi að mannfólk geti verið samkynhneigt. Huffington Post greinir frá þessu.

Musaveni flutti ræðu þar sem hún hrósaði úgandskum biskupum fyrir störf sín eftir að Úganda gerði samkynhneigð ólöglega.



„Við verðum að hlusta á guð og hlýða honum. Þakka þér Guð fyrir að leiða okkur," sagði Musaveni. „Ef kýr eru ekki samkynhneigðar, hvernig geta menn þá verið samkynhneigðir?"



Forseti Úganda, Yoweri Museveni, skrifaði undir andsamkynhneigða löggjöf í febrúar. Samkynhneigt fólk gæti átt yfir höfði sér 14 ára fangelsi fyrir fyrsta lögbrot, en lífstíðardóm fyrir endurtekin samkynhneigð mök.