Lög leyfa lögreglumönnum að sænga hjá vændiskonum

Lögreglumenn í Hawaii hafa beðið um að fá að halda undanþágu á lögum ríkisins sem gerir leynilögreglumönnum kleyft að sænga hjá vændiskonum við rannsóknir. Rökin eru þau að undanþágan sé nauðsynleg til að góma glæpamenn við framkvæmd glæpsins.

Sagt er frá þessu á vef Guardian.

Gagnrýnendur, sem eru sérfræðingar í mannsali og lögregluþjónar segja undanþáguna óþarfa og að hún geti gert vændiskonur að frekari fórnarlömbum. Margar þeirra eru neyddar út í vændi.

Lögregluyfirvöld í Hawaii hafa þó ekki gefið út hvort undanþágan hafi verið nýtt og þá hve oft. Þegar beiðnin var lögð fram sögðu yfirvöld að reglur væru til staðar sem kæmu í veg fyrir að lögreglumenn geti nýtt sér undanþáguna í eigin þágu.

„Misnotkun af höndum lögreglumanna er hluti af lífi vændiskonu,“ sagði Melissa Farley, framkvæmdastjóri samtaka sem rannsaka vændi. Ennfremur sagði hún að konur sem hafi komist úr vændi segi reglulega frá því að hafa verið neyddar til samneytis við lögreglumann, til að komast hjá því að vera handteknar.

„Lög og starfsreglur leynilögregluþjóna verða að vera leynilegar,“ sagði Jerry Inouye, lögreglustjóri. „Ef aðilar grunaðir um vændisstarfsemi þekkja þær reglur, vita þeir nákvæmlega hve langt leynilögregluþjónn má ganga.“