Villas-Boas til Rússlands

Líklegt þykir að Portúgalinn André Villas-Boas verði kynntur sem nýr þjálfari Zenit frá Pétursborg á næstu dögum.

Samkvæmt fréttum í rússneskum fjölmiðlum mun Villas-Boas skrifa undir þriggja og hálfs árs samning við rússneska liðið, en hann mun taka við starfinu af Ítalanum Luciano Spalletti sem var leystur undan störfum á dögunum.

Jorge Jesus, þjálfari Benfica, greindi sömuleiðis frá því á blaðamannafundi í gær að Villas-Boas hefði staðfest í samtali við sig að hann væri á leið til Zenit.

Villas-Boas hefur verið án starfs síðan hann var rekinn frá Tottenham í desember síðastliðnum. Hann hefur einnig stýrt Academia, Porto og Chelsea, þrátt fyrir að vera aðeins 36 ára gamall.

Zenit situr í öðru sæti rússnesku deildarinnar, þremur stigum á eftir toppliði Lokomotiv Moskvu. Pétursborgarliðið leikur á miðvikudaginn seinni leik sinn við Dortmund í 16 liða úrslitum Meistaradeildar Evrópu. Zenit tapaði fyrri leiknum 4-2 á heimavelli sínum.