Árásarmanna leitað logandi ljósi

Að minnsta kosti 33 eru látnir og um 140 liggja sárir eftir að vopnaðir menn gengu berserksgang vopnaðir hnífum á lestarstöð í Kunming, í suðvestur hluta Kína, í gærkvöldi.

„Við biðum í biðröð þegar við sáum skyndilega fjölda fólks koma hlaupandi. Einn þeirra var með hníf og stakk alla sem fyrir voru," segir Wang Hongli, 23 ára.

Yfirvöld í Kína segja árásarmennina tilheyra hópi aðskilnaðarsinna frá norðvesturhluta Sinjíang-héraðs sem lengi hafa barist fyrir sjálfstæði. Fjórir árásarmannana féllu fyrir hendi lögreglu og ein kona var handtekin á staðnum, grunuð um aðild að ódæðinu.

Lögreglan leitar nú þeirra sem flúðu af vettvangi, en talið er að árásarmennirnir hafi verið tíu talsins.

Kínverskir fjölmiðlar segja árásina í gær vera „hinn kínverska ellefta september", og kalla eftir átaki stjórnvalda til að stemma stigu við ofbeldisverkum.