Aðstoðarmaður David Cameron handtekinn vegna barnakláms

Patrick Rock, háttsettur aðstoðarmaður David Cameron, forsætisráðherra Bretlands, hefur verið handtekinn vegna gruns um að vera með barnaklám í tölvu sinni. Rock tók þátt í að þróa stefnu stjórnvalda í Bretlandi varðandi netklám þar sem loka átti á aðgang Breta að klámsíðum á internetinu.

Guardian segir frá þessu. Rock var handtekinn í íbúð sinni, en hann hafði sagt upp stöðu sinni eftir að stjórnvöld komust á snoðir um rannsókn lögreglu.

Í byrjun febrúar sagði ráðherra innflytjendamála í Bretlandi af sér eftir að í ljós kom að húshjálp hans til margra ára hafði ekki atvinnuleyfi í landinu.

Andy Coulson, fyrrum samskiptastjóri forsætisráðherrans, sagði af sér í byrjun árs 2011. Þá átti hann yfir höfði sér handtöku og ákæru vegna símahleranna dagblaðsins News of the World, sem hann ritstýrði. Hann hafði þá unnið fyrir David Cameron í þrjú og hálft ár.