Vel á fjórða þúsund manns á Austurvelli

Vel á fjórða þúsund manns kom á Austurvöll til þess að mótmæla áætlunríkisstjórnarinnar að draga aðildarumsókn Íslands í Evrópusambandið til baka. 

Enn er talsverður fjöldi staddur á Austurvelli.

Mótmælendur framkalla hávaða með því að lemja í grindverkið sem komið hefur verið upp í kringum Alþingishúsið. Einnig hafa einhverjir tekið með sér potta í mótmælin og lemja á þá til þess að framkalla hávaða.

Mótmælin hafa farið friðsamlega fram.

Að sögn viðstaddra var hávaðinn nokkur.

Að sögn viðstaddra var fólk á öllum aldri og öllum stéttum samfélagsins þarna samankomið.

Þingsályktunartillaga Gunnars Braga Sveinssonar var lögð fram á föstudagskvöld og mótmæltu stjórnarandstæðingar því harðlega að þingsályktunartillagan yrði tekin til umræðu í þinginu í dag. Einar K. Guðfinsson þingforseti ákvað að verða við bón stjórnarandstæðinga og tók málið af dagskrá þingsins í dag. 

Mikill hiti hefur einkennt umræður í þinginu í dag. Stjórnarandstæðingar hafa gagnrýnt störf þingforseta, vegna þess að til stóð að setja umræðu um þingsályktunartillöguna á dagskrá þingsins í dag.