Tala látinna nemenda í Nígeríu hækkar

59 grunnskólanemendur í heimavistarskólanum í Yohe fylki í Norðaustur-Nigeríu voru myrtir af herskáum hópi múslima sem kallar sig Boko Haram eða „Vestræn menntun er syndug“.

Nemendur voru skotnir niður og skólinn brenndur  til grunna. Þessu greinir The Guardian frá.

Í fyrstu var talið að tala látinna væri 29 eins og vísir greindi frá í gær en nú hefur Bala Ajiya, forsvarsmaður spítalans í Damaturu, sagt töluna vera 59. „Fleiri lík hafa komið inn en stjórnvöld greindu frá. Þau hafa fundist í skógarrjóðri þar sem særðir nemendur reyndu að flýja en létust af skotsárum sínum.“

Hermenn Boko Haram hafa áður gert slíka árás á skóla. Í júní síðastliðnum gerðu þeir árás í nærliggjandi þorpi í Mamudo þar sem 22 nemendur létu lífið.