Steve Jobs-stytta vekur misjöfn viðbrögð

Stytta af Steve Jobs, stofnanda Apple, var afhjúpuð í vikunni og hefur sérkennilegt útlit hennar vakið athygli. Jobs lést árið 2011 en hann var einn helsti talsmaður fyrirtækisins og andlit þess út á við.

Afhjúpun styttunnar fór fram í Belgrad en það er serbneski myndhöggvarinn Dragan Radenovic sem stendur á bak við verkið. Jobs hefði orðið 59 ára í vikunni.

Styttan sýnir höfuð Jobs á háum stöpli og standa kýrillískir stafir út úr stöplinum, auk tölustafanna 0 og 1, en þeir tákna tvíundatölur.

Hönnun Radenovics var valin úr meira en tíu þúsund verkum í alþjóðlegri keppni en margir hafa lýst frati á verkið, eins og kemur fram í frétt Business Insider, og kallar miðillinn styttuna hræðilega ljóta. Þá spurði vefsíðan Gizmodo lesendur sína hvað þeim fyndist um verkið og var fátt um jákvæð svör.

Engu að síður eru forsvarsmenn Apple ánægðir og stendur til að reisa styttuna í stækkaðri mynd fyrir framan höfuðstöðvar fyrirtækisins í Kaliforníu þegar búið er að ganga frá formsatriðum. Verður hún þá á bilinu þriggja til fimm metra há.