Forsætisráðherra Ítalíu segir af sér

Forsætisráðherra Ítalíu, Enrico Letta, segist ætla að segja af sér á morgun. Letta var leiðtogi Partito Democratico – flokki Demókrata á Ítalíu um árabil en yngri flokksbróðir hans, Matteo Renzi, náði formannskjöri á síðasta flokksþingi. Renzi er borgarstjóri Flórens og hefur nú gefið út að hann sækist eftir starfi Letta – vill verða forsætisráðherra.

Letta segir ákvörðun sína byggða á ákvörðun flokksins og mun formlega afhenda Giorgio Napolitano, forseta Ítalíu, afsögn sína á morgun.

Efnahagurinn slæmur

Renzi, sem er 39 ára, þykir Letta ekki hafa náð nægilegum tökum á efnahagi Ítalíu. Atvinnuleysið er mikið í landinu; hefur ekki verið jafn mikið í 40 ár. Neikvæður hagvöxtur hefur hrjáð Ítali, hagkerfið hefur rýrnað um níu prósent undanfarin sjö ár. Ríkisstjórn Letta hefur gengið vel að ná tökum á eyðslu hins opinbera.

En það hefur ekki skilað sér út í hagkerfið. Regluvætt atvinnulíf Ítala er talið gera hagkerfinu erfitt fyrir og eitt af verkefnum Letta átti að vera að endurbæta löggjöfina og gera atvinnurekendum auðveldara fyrir. Það hefur ekki gengið eftir.