Óhuggulegt klifurmyndband slær í gegn

Myndband af klifri tveggja ofurhuga á topp Sjanghæturnsins hefur vakið mikla athygli og hefur myndbandið verið spilað rúmlega 23 milljón sinnum á YouTube frá því það var birt fyrir viku.

Sjanghæturninn er 121 hæða og 632 metra hár. Stefnt er á að ljúka byggingu hans á þessu ári og verður hann opnaður almenningi árið 2015.

Þeir Vadim Makhorov og Vitaliy Raskalov klifruðu upp turninn á nýársdegi Kínverja, þann 31. janúar. Makhorov er 24 ára gamall Rússi en Raskalov er 21 árs Úkraínumaður. Þeir biðu með klifrið til miðnættis í von um að þá væru öryggisverðir sofnaðir. Það fylgir ekki sögunni hvort sú varð raunin, en félagarnir létu vaða og tók klifrið um sólarhring.

Fyrstu 120 hæðirnar klifruðu þeir á tveimur klukkustundum en þeir þurftu að bíða í um það bil átján klukkutíma eftir betra veðri til að komast upp á topp.

Mennirnir, sem sagðir eru gefa upp fölsk nöfn, segjast ekki vilja ögra yfirvöldum en lögreglan í Sjanghæ hefur engu að síður sent út tilkynningu þar sem þeir vara fólk við uppátækjum sem þessu.

Nánar er fjallað um atvikið á vef The Economist en myndband af klifrinu má sjá í spilaranum hér fyrir neðan. Lofthræddir eru þó varaðir við að horfa á það.