Íslensk tónlistarútgáfa að hruni komin

Sena, stærsti plötuútgefandi landsins, gaf út 45 plötur á síðasta ári. Þeir ætla að gefa út 20 núna. Þetta segir Bubbi Morthens sem fullyrðir að hrun blasi við í útgáfu íslenskrar tónlistar eins og við þekkjum hana.

„Miðað við þróun á sölu á íslenskum plötum undanfarin 3 ár, og þá er ég ekki að tala um Múgison eða Ásgeir Trausta, þeir eru frávik, gæti sú staða verið að koma upp að útgáfa á íslenskum plötum leggist af. Þetta er staðreynd. Það er svo mikið tap á íslenskri plötusölu, meðal annars út af ólöglegu niðurhali, svo mikið að hefðbundin útgáfa eins og við þekkjum hana er að hverfa. Stór hluti af íslenskri tónlist eins og við þekkjum hana er að leggjast af,“ segir Bubbi.

Hann talar um mikið tap á útgáfunni á síðasta ári. Sjálfur hefur hann mátt súpa seyðið af hinni neikvæðu þróun. „Síðustu sólóplötur mínar hafa slefað í að rétt ná inn kostnaði og ekki það. Síðustu tvær plötur. Ég er ekki einn um það, þetta er almennt séð yfir bransann. Við erum að tala um stærstu nöfnin, ástsælustu söngvarana, músíkanta eins og Ragga Bjarna og þannig má lengi telja. Fyrir tíu árum hefðum við verið að tala um stórsölu á þessum plötum,“ segir Bubbi sem á árum áður seldi plötur sínar í bílförum. Enda löngum kallaður kóngurinn.

„Þetta er meðal annars það sem útgefendur eru að tala um. Ég er komin á þann stað að það borgar sig ekki lengur að gera plötu. Ég tapa á því. Þetta er sorgleg staðreynd að íslensk tónlist sungin á íslensku er líklega að hverfa af markaðinum,“ segir Bubbi sem íhugar nú alvarlega stöðu sína. „Nei, þú ert ekki að fara að setja fyrirsögnina „Bubbi hættur að gefa út plötur“ á þetta spjall okkar. En ég er að íhuga alvarlega stöðu mína. Það hefur ekkert uppá sig að gefa út tónlist ef þú endalaust tapar á því. Það er bara þannig. Ég er ekkert einn um þetta. Staðan er þannig, maður er kominn á þann punkt að maður er að íhuga; á maður að halda áfram að gefa út plötur? Á maður að halda áfram að semja tónlist? Stór partur af þessu vandamáli er netið og veiturnar. Spotify skilar engum tekjum til mín né nokkurs íslensks tónlistarmanns. Einu tekjurnar eru þær að spila "læv". Áttatíu prósent þeirra platna sem gefnar eru út eru gefnar út með tapi. Hún gæti verið að leggjast af, útgáfa á íslenskri tónlist, eins og við þekkjum hana.“

Næsta sólóplata frá Bubba er í salti og á hann þó nægt efni.