Barnsgrátur barst frá íbúðinni á öllum tímum sólarhrings

Fjögur önnur börn eru til heimilis á sama stað og sex ára gömul telpa sem Hæstiréttur úrskurðaði í fyrradag að skyldi dvelja hjá fósturfjölskyldu á meðan alvarlegar ásakanir um vanrækslu eru til rannsóknar. Grunur leikur á að telpan hafi verið fórnarlamb mansals.

Telpan var flutt hingað til lands seinnihluta árs 2012 af móðurafa sínum. Samkvæmt upplýsingum frá Þuríði Halldórsdóttur, lögfræðingi afans, er um að ræða flóttafólk frá Haíti sem flúði hingað til lands eftir mannskæðan jarðskjálfta þar í landi.

Við komuna hingað vísaði afinn fram gögnum þar sem tekið var fram að hann færi með forsjá telpunnar þar sem móðir hennar hefði látist í hamförunum. Fjölskyldan flutti inn til ættmenna sem búsett hafa verið hér á landi um nokkurt skeið á grundvelli fjölskyldusameiningar.

Hæstiréttur staðfesti í gær að stúlkan skyldi vistuð utan heimilis síns á meðan alvarlegar ásakanir um vanrækslu eru til rannsóknar. Grunur leikur á að afi hennar hafi flutt hana til Íslands með fölsuðum skilríkjum og til skoðunar eru ásakanir um að stúlkan gæti verið fórnarlamb mansals.

Lögfræðingur afans baðst undan viðtali þegar fréttastofa leitaði eftir því en  segist vera undrandi á dómi Hæstaréttar. Hún segir ásakanir um ofbeldi og mansal vera alvarlegar og úr lausu lofti gripnar.

Hinsvegar benda fyrirliggjandi upplýsingar sterklega til þess að stúlkan hafi búið við nokkra vanrækslu og að aðstæður á heimilinu hafi ekki verið viðunandi. Athygli vekur að auk telpunnar voru fjögur önnur börn á heimilinu, frændskystkini hennar, fædd 1995, 1997, 2005 og 2010.

Í dómnum er meðal annars greint frá því að börnin hafi verið eftirlitslaus og að mikill barnsgrátur bærist frá íbúðinni á öllum tímum sólarhrings, í bland við háværa tónlist, öskur og köll. Tilkynningar bárust um að afinn hefði beitt  telpuna, sem og aðra á heimilinu, ofbeldi og meðal annars barið hana með belti. Þá væri börnunum á heimilinu refsað með því að læsa þau inni á baðherbergi í margar klukkustundir samfleytt.

Halldóra Dröfn Guðmundsdóttir, formaður barnaverndarnefndar Reykjavíkur, segir að þegar alvarlegar tilkynningar berist sé hægt að út frá því að aðstæður allra barna á tilteknu heimli séu kannaðar. Andstætt máli telpunnar var ekki talin þörf á að fjarlægja hin börnin af heimilinu.