Barn tekið af heimili sínu vegna gruns um ofbeldi og mansal

Hæstiréttur staðfesti í gær að sex ára stúlka skyldu vistuð utan heimilis síns á meðan alvarlegar ásakanir um vanrækslu eru til rannsóknar. Grunur leikur á að afi hennar hafi flutt hana til Íslands með fölsuðum skilríkjum og til skoðunar eru ásakanir um að stúlkan gæti verið fórnarlamb mansals.

Barnavernd Reykjavíkur hefur haft til meðferðar mál er varðar 6 ára gamla frönskumælandi stúlku sem flutt var hingað til lands, seinnihluta árs 2012, af móðurafa sínum.

Við komuna hingað vísaði afi stúlkunnar fram gögnum þar sem tekið var fram að hann færi með forsjá hennar þar sem móðir hennar væri látin. Hann hafði þar einnig heimild frá föður um að flytja stúlkuna frá heimalandi sínu, ásamt fleiri fjölskyldumeðlimum, ungri móðursystur, auk annars barnabarns og fyrrum eiginkonu hans. Fjölskyldan flutti inn til ættmenna sem búið hafa á landinu frá árinu 2009 á grundvelli fjölskyldusameiningar.

Eftir að ítrekaðar tilkynningar bárust Barnavernd Reykjavíkur um óviðunandi aðstæður á heimilinu var mál stúlkunnar tekið til skoðunnar. Ábendingar bárust um ofbeldi og alvarlega vanrækslu á börnunum á heimilinu og grunur um að stúlkan hafi verið beitt kynferðisofbeldi. Í málsgögnum kemur jafnframt fram að möguleiki sé á að stúlkan hafi komið hingað á fölsuðum skilríkjum. Þá bárust einnig dularfullir tölvupóstar til Barnaverndar um að vændisstarfsemi færi fram á heimilinu, skjöl fjölskyldunnar væru fölsuð og alvarlegar ásakanir um að stúlkan væri fórnarlamb mansals.

Stúlkan hefur verið vistuð á fósturheimili síðan 1. desember, í sex mánuði, að fengnum dómsúrskurði Héraðsdóms Reykjavíkur.

Dóminn staðfesti Hæstiréttur í gær. Tekið er fram í dómsorði að brýnt sé að skoða mál stúlkunnar til hlýtar áður en hún verði afhent forsjár aðila aftur.