Lík í tísku

Reglulega birtast auglýsingaherferðir og tískuþættir þar sem fallegum, og gjarnan fáklæddum, konum er stillt er upp sem liðnum líkum. Á vef Guardian voru tekin saman nokkur dæmi um slíkar myndir og setur pistlahöfundur fram áleitnar spurningar um tilkomu þeirra. 

Í nýrri auglýsingaherferð tískurisans Marc Jacob má sjá hina umdeildu Miley Cyrus sitja við hlið liggjandi konu. Í þetta sinn er það þó ekki Miley Cyrus sjálf sem vekur athygli heldur er það konan sem liggur við hlið hennar sem virðist vera látin. Hún liggur fallega klædd á bakinu með fölt andlit og stífan líkama.

Degi áður en auglýsing Marc Jacobs birtist mátti sjá leikarann Ben Affleck á forsíðu bandaríska tímaritsins Entertainment Weekly hjúfra sig upp að leikkonunni Rosamund Pike, sem liggur föl og líflaus á bekk sem virðist eiga heima í líkhúsi.

Á síðasta ári birti Vice Magazine tískuþátt þar sem þekktir kvenrithöfundar voru sýndir fremja sjálfsmorð, eða reyna það. Sylvia Plath á hnjánum fyrir framan ofn. Virginia Wolf standandi úti í miðri á með stóran stein í höndunum, Dorothy Parker að skera sig á púls. Með myndunum mátti sjá lýsingar á fötum fyrirsætanna, allt niður í sokkabuxurnar sem taívanski rithöfundurinn Sanmao notaðar sem snöru.

Árið 2006 birti kínverski fatahönnuðurinn Jimmy Choo auglýsingu sem sýnir líflausa konu liggjandi í bílskotti og karlmann sitja við hlið hennar með skóflu. Ári síðar mátti sjá fyrirsætuna Doutzen Kroes meðvitundalausa og hálfnakta í tískuþætti W magazine.

Á vef Guardian spyr pistlahöfundur sig hvers vegna tískuheimurinn sýni kvenkyns lík með þessum hætti. Þrátt fyrir að Vice magazine hafi að lokum beðist afsökunar á sjálfsmorðstískuþætti sínum og tekið hann úr birtingu á netinu haldi sambærilegar myndir áfram að birtast í auglýsingum og tískuþáttum. Hún spyr sig hvort auglýsingageirinn hafi komist að þeirri niðurstöðu að þar sem staðalímynd kvenna í samfélaginu sé að þær séu óvirkar og viðkvæmar, sé ekkert meira freistandi en látin stúlka.