Afhentu útvarpsstjóra bænaskjal og bænabók

Nokkur fjöldi fólks safnaðist saman við Útvarpshúsið í Efstaleiti klukkan 7:30 í morgnun til þess að þakka útvarpsstjóra og hvetja hann til að halda áfram með Orð kvöldsins í þágu eldri borgara.

Sem kunnugt er dró útvarpsstjóri á dögunum ákvörðun sína til baka um að hætta með dagskrárliðina Morgunbæn og Orð kvöldsins.

Í tilkynningu frá hópnum kemur fram að í hópnum séu hvorki aðgerðarsinnar né mótmælendur.

„Við erum kristið fólk sem viljum eiga samleið í bæn. Bænin opnar fyrir það fegursta í hjarta okkar og hug,“ segir hópurinn sem bað þakkar- og fyrirbæn á grasbalanum í rjóðrinu fyrir norðan Útvarpshúsið í morgun.

Var stundin sett upp í anda þeirra helgu stunda sem útvarpað er á Rás 1. Var textum dreift á svæðinu til að allir gætu tekið virkan þátt. Var meðal annars farið með Faðir vor og sungið „Í bljúgri bæn“.

Þá var útvarpsstjóra afhent bænabók og kort í þakklætisskyni og jafnframt hvatning til að færa morgunbænina aftar á dagskránni og leyfa kvöldorðum að standa.