Suarez segir að Liverpool hefði ekki barist um titilinn án hans

Luis Suárez er nú búinn að segja það opinberlega sem flestir knattspyrnuáhugamenn eflaust hugsa. Liverpool hefði ekki barist um titilinn í fyrra ef hans hefði ekki notið við.

Liverpool seldi Suárez til Barcelona í haust en hann er enn ekki búinn að spila mótsleik fyrir spænska liðið þar sem hann er enn að taka út leikbann fyrir að bíta Ítalann Giorgio Chiellini í öxlina á HM í Brasilíu í sumar.

Luis Suárez missti af sex fyrstu leikjunum á síðasta tímabili þar sem hann tók út bann fyrir að bíta Chelsea-manninn Branislav Ivanovic. Það kom þó ekki í veg fyrir að hann yrði markahæsti leikmaður deildarinnar og hjálpaði Liverpool að ná öðru sætinu og komast í Meistaradeildina.

„Ég fór frá Liverpool með höfuðið hátt því án mín þá hefði Liverpool ekki staðið sig svona vel. Það var markmið hjá mér að koma liðinu í Meistaradeildina," sagði Luis Suárez við Daily Mirror.

„Það er alltaf ánægjulegt þegar gengur vel hjá manni og maður gleðst yfir því að fá laun erfiðisins. Ég set samt alltaf liðið í fyrsta sæti og Liverpool var svo nálægt því að vinna titilinn. Það hefði verið stórkostlegt," sagði Suárez.

„Ég kann alveg að meta það sem liðið gerði. Ég missti samt af sex leikjum og skoraði öll mín mörk í ensku úrvalsdeildinni án þess að taka vítin," sagði Suárez sem auk þess að skora 31 mark í ensku úrvalsdeildinni á síðust leiktíð þá lagði hann einnig upp 21 mark til viðbótar fyrir félaga sína.

Liverpool hefur ekki byrjað tímabilið alltof vel án hans en liðið er eins og stendur í 9. sæti ensku úrvalsdeildarinnar með 3 sigra í fyrstu 7 leikjunum.