Líkur á verkfalli grunnskólakennara á fimmtudag

Verkfall grunnskólakennara gæti hafist á fimmtudag, náist samningar ekki. Foreldrar barna í einstökum grunnskólum hafa fengið tilkynningu þess efnis. Ekki liggur fyrir formlegt tilboð af hálfu sveitarfélaga.

Ólafur Loftsson, formaður Félags grunnskólakennara, segir samningaviðræður ganga hægt.  Ólafur segir kröfu þeirra nálægt þrjátíu prósentum, en þá sé ekki verið að ræða beinar launahækkanir.

„Þetta er samspil af launahækkunum og kerfisbreytingum. Það fer eftir því hvernig þetta er sett fram. Grunnskólakennarar eru á mun lægri launum en sambærilegar stéttir með sambærilega menntun,“ segir Ólafur.

Fyrsta vinnustöðvun er boðuð næstkomandi fimmtudag. Náist ekki að semja er næsta vinnustöðvun boðuð 21. maí og sú þriðja 27. maí. Ólafur segir að verði samningar enn lausir eftir þann tíma verði staðan endurskoðuð, en ekki hefur verið boðað til allsherjarverkfalls.

Grunnskólakennarar í Kópavogi hafa boðað til mótmæla við bæjarskrifstofur Kópavogs klukkan 16 í dag. 

„Sveitarfélögin semja ekki við okkur og því verður að mótmæla. Forgangsröðunin í Kópavogi er forkastanleg. Íþróttafélögin eru númer eitt og skólarnir númer tvö,“ segir Ásdís Ólafsdóttir, kennari í Snælandsskóla.