Samtök iðnaðarins gagnrýna úrskurðarnefnd um upplýsingamál

Samtök iðnaðarins og Samband íslenskra sveitarfélaga gagnrýna úrskurð úrskurðarnefndar um upplýsingamál þess efnis að sveitarfélaginu Ölfusi sé skylt að afhenda trúnaðargögn varðandi tilboð í sorphirðu í bæjarfélaginu. „Þetta mál vísar út fyrir sig og gæti haft veruleg áhrif á útboðsmarkað hér á landi,“ segir Sigurður B. Halldórsson, lögfræðingur Samtaka iðnaðarins.

Úrskurðarnefnd um upplýsingamál komst að þeirri niðurstöðu, 24. júlí síðastliðinn, að sveitarfélaginu Ölfusi væri skylt að veita samkeppnisaðila þess sem bauð lægst í sorphirðu, aðgang að upplýsingum um tilboð þess sem og fylgigögnum. Þessi tilboðsgögn voru trúnaðarmál milli sveitarfélagsins og lægstbjóðanda. Lægstbjóðandi telur slíkar upplýsingar á samkeppnismarkaði ekki eiga að rata í hendur samkeppnisaðila.

Undir þessi sjónarmið tekur Sigurður B. Halldórsson, lögfræðingur SI. Hann telur að verði fyrirtækjum á opnum markaði gert skylt að veita samkeppnisaðilum ítarlegar upplýsingar um tilboðsgerð sína geti það haft gríðarlegar afleiðingar í för með sér. „Í málinu er deilt um hvort tilboðsskrár bjóðenda í opinberum útboðum verða strax aðgengilegar samkeppnisaðilum við opnun tilboða. Slíkt hefur hvorki tíðkast hér á landi né erlendis og því teljum við rétt að dómstólar skeri úr um réttmæti þess. Þessi úrskurður getur á margan hátt breytt framtíðarskipulagi útboða hins opinbera. Í grunninn er skoðun Samtaka iðnaðarins sú að fyrirtæki eigi ekki að geta grandskoðað tilboðsgerðir annarra fyrirtækja. Samkeppnishagsmunir eru það ríkir.“

Samband íslenskra sveitarfélaga er einnig á þeirri skoðun að full ástæða sé að látið verði reyna á niðurstöðu úrskurðarnefndar fyrir dómstólum. Tryggvi Þórhallsson, lögfræðingur sambandsins, segir að trúnaður eigi að ríkja um meðferð gagna. „Óskoruð meginregla á verktakamarkaði er að trúnaður ríki um sundurliðuð einingaverð í tilboðum. Þessi meginregla og venja henni tengd styðst meðal annars við veigamikil samkeppnissjónarmið. Að mati sambandsins er kaupanda í slíku ferli því bæði rétt og skylt að tiltaka að trúnaður ríki um meðferð gagna. Niðurstaða úrskurðarnefndar grefur undan trúnaðarákvæðum sem eru mikilvæg trygging fyrir því að sveitarfélög fái eins hagstæð tilboð í verk og þjónustu og mögulegt er.“