Klinsmann náði einum í viðbót

Jurgen Klinsmann, þjálfari bandaríska landsliðsins í fótbolta, hefur verið duglegur að fá leikmenn til að "skipta" um landslið síðan að hann tók við bandaríska liðinu og er íslenski framherjinn Aron Jóhannsson einn þeirra.

Nýjasti leikmaðurinn í þessum hópi er vængmaðurinn Julian Green sem er 18 ára gamall og leikmaður Bayern München. Klinsmann hefur unnið markvisst í marga mánuði að tryggja sér þjónustu Green.

Green hefur nú ákveðið að spila með bandaríska landsliðinu og verður væntanlega í HM-hópi Bandaríkjamanna á HM í Brasilíu í sumar.

Green er fæddur í Bandaríkjunum (eins og Aron) en fjölskyldan hans, bandarískur faður og þýsk móðir, fluttu til Þýskalands þegar hann var tveggja ára.

Green hefur spilað í Þýskalandi allan sinn feril og hefur leikið landsleiki með 16 ára, 17 ára og 19 ára liðum Þýskalands. Hann þykir mjög efnilegur, örfættur og eldfljótur en er þó líklegri til að hjálpa bandaríska landsliðinu meira á næstu árum en á HM 2014.

Auk Arons hefur Klinsmann náð í leikmenn eins og "þýska" varnarmanninn Fabian Johnson og "þýska" framherjann Terrence Boyd.