Úrvalslið Eiðs Smára | Sex frá Barcelona

Eiður Smári Guðjohnsen, leikmaður Club Brugge og markahæsti leikmaður íslenska landsliðsins frá upphafi, hefur leikið með mörgum frábærum leikmönnum á ferli sem spannar tvo áratugi.

SkySports fékk Eið til að velja úrvalslið með bestu samherjum sínum á ferlinum. Hann valdi sex leikmenn sem hann spilaði með hjá Barcelona, tvo samherja frá bæði Chelsea og PSV og einn frá tíma sínum hjá Tottenham.

Hér má sjá liðið sem Eiður valdi og brot af því sem hann hafði að segja um hvern og einn leikmann.

Markvörður: Victor Valdes | Það var erfitt að velja á milli Victors Valdes og Petr Cech, en ég gef Valdes mitt atkvæði því hann er aðeins betri með boltann á löppunum en Cech. Hann býr yfir miklum sprengikrafti og er mjög fljótur út af línunni.

Hægri bakvörður: Dani Alves | Hann kostaði Barcelona 30 milljónir evra og fólk spurði sig hvort að það væri réttlætanlegt að eyða svona hárri fjárhæð í bakvörð, en núna, nokkrum árum síðar, efast ég um að nokkur muni hvað hann kostaði.

Vinstri bakvörður: Gareth Bale | Þú færð líklega ekki mest út úr honum í þessari stöðu en þetta er Gareth Bale. Í upphafi ferils hans hjá Tottenham virtist liðið tapa í hvert sinn sem hann spilaði en þegar hann var færður aðeins framar á völlinn sprakk hann út.

Miðvörður: Marcel Desailly | Kletturinn, eins og við kölluðum hann hjá Chelsea. Leiðtogi, fyrirliði, heimsmeistari.

Miðvörður: Jaap Stam | Ég átti erfitt með að velja á milli Johns Terry, Carles Puyol og Gerards Pique en ég valdi Jaap Stam.

Varnarsinnaður miðjumaður: Claude Makalele | Þessi staða var nefnd í höfuðið á honum. Hann var sá sem batt liðið saman og var alltaf á réttum stað til að brjóta sóknir andstæðinganna á bak aftur.

Miðjumenn: Andres Iniesta og Xavi | Ég tala um þessa tvo í sömu andrá. Þegar talað er um lið Barcelona á síðustu árum, þá geturðu ekki sleppt að minnast á hvernig þessir tveir leikmenn stjórnuðu leiknum.

Framherji: Ronaldinho | Þetta var ekki erfið ákvörðun. Hann er fullkomnasti leikmaður sem ég hef séð. Það kæmi mér ekki á óvart ef hann gæti látið boltann tala. Hann var það góður að hann gat gert allt.

Framherji: Ronaldo | Hinn brasilíski Ronaldo. Við sömdum við PSV í sömu vikunni. Ég var bara 16 ára krakki en hann var þegar orðinn fullþroskaður maður, 18 ára að aldri. Hann bjó yfir ótrúlegum hraða, hæfileika til að skora og fara framhjá varnarmönnum.

Framherji: Lionel Messi | Ég þarf ekkert útskýra þetta? Hann var að ég held 19 ára þegar ég kom til Barcelona og ég sá þennan stórkostlega leikmann breytast í besta leikmann í heimi.