Gæti verið frá sautjándu öld

Yfirvöld í Frakklandi hafa á botni Signu fundið dularfulla höggmynd sem kann að hafa legið þar öldum saman.

Í gærkvöld hífði vatnalögreglan í París 60 sinnum 90 sentímetra stóra steinhöggmynd upp úr ánni undir elstu brú Parísar, Pont Neuf. Kafari rakst fyrst á höggmyndina í september.

Hvorki liggur fyrir aldur höggmyndarinnar né uppruni, eða hve lengi hún hefur legið í ánni. Þó er talið að hér geti verið um að ræða úthöggvinn stein sem fallið hafi úr stoðum upprunalegu brúarinnar.

Byggingu Pont Neuf, sem á frönsku þýðir „nýja brú“, var lokið árið 1607 og hún skreytt verkum myndhöggvarans Germain Pilon.