Útlenskir lögbrjótar útlægir

Efri deild Argentínuþings hefur samþykkt frumvarp sem heimilar að erlendum lögbrjótum verði vísað úr landi.

Búist er við að frumvarpið, sem nýtur stuðnings forseta landsins, Cristinu Fernandez, verði líka samþykkt í neðri deild þingsins og verði þar með að lögum.

Fernandez hefur sagt að þeim útlendingum sem komi til landsins með lögbrot í huga hafi fjölgað.

Samkvæmt frumvarpinu verður hægt að vísa útlendingum sem uppvísir verða að lögbrotum umsvifalaust úr landi og meina þeim að koma aftur í fimm ár.