Afi myrti dóttur sína og barnabarn í Seattle

Maður á sjötugsaldri virðist hafa myrt dóttur sína og barnabarn í bandarísku borginni Seattle á mánudagskvöld áður en hann skaut sjálfan sig til bana.

Að sögn lögreglu barst tilkynning um harmleikinn frá 10 ára gömlum dreng sem slapp frá heimilinu, og að hann hafi augljóslega verið í miklu áfalli. Í frétt NBC kemur fram að barnabarn mannsins sem lést hafi verið stúlka á táningsaldri.

Nicholas Metz, talsmaður lögreglu, segir að drengnum hafi verið komið fyrir í umsjá ættingja, en að ekki liggi fyrir um hvað hafi nákvæmlega valdið harmleiknum.

Ed Murray, borgarstjóri Seattle, sótti fréttamannafund lögreglunnar vegna málsins á mánudagskvöldið. „Þrír íbúar borgarinnar eru látnir. Skotvopn komu við sögu. Heimilisofbeldi kom væntanlega við sögu,“ sagði Murray.